BAGUIO CITY – Agpapaimbag ita iti pagagasan dagiti 10 nga indibidual a nadangran iti panakatumba ti naglugananda a parapasahero a bus sadiay Caliking, Atok, Benguet idi malem kalman.
Iti panakaiyuman ti Bombo Radyo Baguio kenni Police Major Ruben Labutan, hepe ti Atok Municipal Police Station, kinunana a paturong sadiay Bontoc, Mountain Province ti bus idi posible a napukaw ti driver iti kontrol iti bus.
Nagresulta daytoy iti panangdungpar ti bus iti poste ti kuryente ti Benguet Electric Cooperative sakbay a natumba.
Naamuan a 43 dagiti pasahero a nakalugan iti nasao a bus ken dagus a naiturong iti pagagasan dagiti nadangran.
Nagresulta ti insidente iti atiddog a pila dagiti lugan a paturong sadiay Mountain Province.
Naawan met ti suplay ti kuryente iti 29 a babbarangay kadagiti munisipyo ti Tublay, Kapangan, Atok ken Kibungan iti Benguet gapu iti insidente.
Naituding nga ituloy ti pulisya ti imbestigasyon iti nasao nga insidente.
