Kinumpirmar ti Department of Foreign Affairs a natalged a naisubli ti 10 pay a Pilipino manipod iti Oddar Meanchey Province sadiay Cambodia babaen ti tulong dagiti pannakabagi ti linteg ti Cambodia ken ti Philippine Embassy sadiay Phnom Penh.
Inawat dagiti pannakabagi manipod kadagiti ahensia ti gobierno, pakairamanan ti DFA, Department of Migrant Workers, Overseas Workers Welfare Administration ken Inter-Agency Council Against Trafficking, dagiti sangapulo a nagawid iti airport ken nangipaayda iti tulong.
Inwaras ti Philippine Embassy kadakuada dagiti care package ken binayadanna ti repatriation flight dagitoy babaen ti Department of Foreign Affairs’ Assistance to Nationals (ATN) Fund.
Indanon met ti Philippine Embassy ti panagyamanna iti Royal Government of Cambodia gapu iti atension a naipaay kadagiti pannakabagi ti gobierno ti Pilipinas para kadagiti 10 a Pilipino a maiyawid iti pagtaenganda.
Idi napalabas a lawas, duapulo ket innem a Pilipino ti naisubli manipud iti Oddar Meanchey Province.
Impalagip ti Philippine Foreign Service kadagiti Pilipino a liklikan ti pannakabiktima kadagiti makaallilaw a gundaway iti trabaho iti ballasiw-taaw a maidiadiaya iti social media.
