Pimmusay dagiti sangapulo ket maysa nga indibidual a karga ti pick-up gapu iti aksidente idiay Barangay Ayaga, Abulug, Cagayan, alas dose itay parbangon, Hulyo 11, 2024.
Maibasar iti report dagiti otoridad, dagiti pimmusay a biktima ket dagiti agama a da Rodolfo Time Sr. ken Rodolfo Time Jr., dagiti agkabsat a da Evelyn Time ken Christina Jane Time, kadwada dagiti kapamilyada a da Mary Jane Time, Lovely Time, Crishia Shane Time, Kimberly Mangupag-Time, Rodelyn Time, ken Angel Time, bin-ig a residente ti Allacapan, Cagayan.
Ti driver met ti pick-up ket ni Nestor Mangupag a residente ti Gattaran, Cagayan bayat a ti driver ti bus ket ni Jay-jet Andrada, residente ti barangay Logac, Lal-lo, Cagayan.
Maibasar iti inisyal nga impormasyon, nagtaud iti lamay dagiti sangapulo ket tallo a karga ti pick-up idiay Flora, Apayao ken paawid dagitoy idiay Brgy. Dana-Ili, Allacapan, Cagayan idi nadungpar ti pampasahero a bus a nagtaud iti siudad ti Baguio ken paturong met idiay Sta. Ana, Cagayan.
Paruar ti pick-up truck iti provincial road ti Brgy. Ayaga idi ditoy a nadungpar ti paumay a bus.
Gapu iti napigsa nga impact ket dimmiretso ti pick up iti maysa a talipapa bayat a naidungpar met ti bus iti pader ti maysa nga establishemento.
Nakalasat iti peggad ti driver ti pick-up ken ti maysa a pasahero bayat a pimmusay met dagiti sangapulo ket maysa a pasahero.
Iti met benneg ti pampasahero a bus, nagsagrap ti driver ken dagiti sumagmamano a pasahero ti bassit a dunor ngem nasayaat ti kondisyonda iti agdama.
Manamnama a sumango ti driver ti bus iti kaso a reckless imprudence resulting to homicide and damage to property.
