TUBA, BENGUET- Dumanon iti 12 a lugan ken motorsiklo ti karaman iti napasamak a karambola sadiay Kennon Road Millsite, Sitio Camp 4, Barangay Camp 6, Tuba Benguet idi Enero 09, 2026.
Sigun kenni Police Captain Marlon Papco-o ti Tuba Municipal Police Station, tallo dagiti kangrunaan a nairaman iti insidente.
Dadduma kadagiti biktima ket pakairamanan dagiti nakaparada.
Maibasar iti imbestigasion dagiti otoridad, paturong iti siudad ti Baguio ti maysa a wing van truck.
Nupay kasta, naaddaan daytoy iti mechanical defect wenno loose break.
Gapu iti dayta, naidungpar iti sarsarunuenna a Jeep no sadino, naiduron iti agarup 200 meters ti kaadayuna.
Nangitunda daytoy iti pannakabanga dagiti lugan ken motorsiklo.
Sigun kenni PCPT. Papco-o, awan ti nadangran iti napasamak nga insidente.
Iti nasao nga insidente, awan ti maipila a kaso ngem nagkiddaw dagiti sumagmamano a biktima iti bayad para kadagiti nadadael a paset ti lugan dagitoy.
Kabayatanna, nagpalagip ti nasao nga opisial kadagiti motorista a kanayun a sukimaten dagiti lugan sakbay nga agbiahe.//via Bombo Noveh Organo
