Sinuspindir ti National Police Commission (Napolcom) ti 90 nga aldaw, dagiti 12 a police officers a maatap nga adda ti pakainaiganda kadagiti mapukpukaw a sabungeros wenno cockfighting enthusiasts.
Nasuspinder dagiti nasao a police officers tapno malapdan dagiti opisial a mangimpluensia kadagiti tistigo ken maliklikan a makompromiso ti imbestigasion.
Sigun kenni Napolcom Vice Chairman Rafael Vicente Calinisan, daytoy ti wagas ti nasao nga ahensia tapno masigurado ti kinatalged dagiti tistigo ken ti integridad ti imbestigasion.
Karaman kadagiti nasuspinder da Police Lt. Col. Ryan Eliab Orapa, Police Maj. Mark Philip Cimborio Almedilla, Police Col. Jacinto Rodriguez Malinao Jr., ken siam a chief master sergeants ken corporals.
Maipalagip nga inakusaran ti whistleblower Julie Patidongan dagiti nasao a police officer a karaman dagitoy iti pannakapapatay dagiti mapukpukaw a sabungeros.
Innayon ni Patidogan a nakaawat dagitoy iti bayad manipud iti maatap a Mastermind ni Atong Ang.
