BAGUIO CITY – Indeklara ti Malakanyang nga special non-working holiday ti November 23 wenno inton Lunes iti probinsia ti Benguet babaen iti Proclamation No. 1046.
Sigun iti Palasyo, para daytoy iti panangrambak ti probinsia iti 120th Benguet Foundation Day.
Kabayatanna, kinuna ni Governor Melchor Diclas a marugian ti simple ken toned-down a selebrasyon ti Benguet Day ita a tawen babaen kadagiti kararag ken ritwal.
Sumaruno ti pangaldaw ken panakabigbig dagiti nangabak iti beautification road projects ti probinsia.
Maisayangkat iti malem ti Lunes ti “Lubon”, maysa a ritwal dagiti Kankana-ey, no sadino, maparti ti maysa a lalaki ken maysa a babai a baboy a sarunuen ti panangikararag dagiti elders iti kinatalged dagiti umili ken iti panakaisardengen ti ad-adda a panagwaras ti novel coronavirus.
Kinuna ni Gov. Diclas a saanen a rambakan ti probinsia ti nalatak nga Adivay Festival gapu iti agdama a pandemya.
