BAGUIO CITY – Dumanon iti 14 a negosyo ditoy siudad ti Baguio ti kinasuan ti Bureau of Internal Revenue (BIR) – Cordillera idi napalabas a tawen gapu iti panaglabsingda iti linteg ti panagbuis.
Sigun kenni Atty. Jesusa Jamon, dadaulo ti Legal Division ti BIR-Cordillera, kaaduan kadagiti nasao a kaso ti ‘unlawful pursuit of business’ wenno dagiti saan a nakaparehistro wenno awanan ti business permit.
Kinunana nga adda met dagiti tax evaders a nagaramat iti modus a ‘double deed of sale’ a madukduktalan no adda ti tumaod a parikut kadagiti nasao a deed of sale ken maidanun iti korte.
Naamuan a kaaduan kadagiti impilaanda iti kaso idi napalabas a tawen ket negosyante iti merkado publiko ti Baguio ken 13 kadagitoy ti naipasidong ti kasoda iti negosasyon bayat a maysa ti nagaplikar iti tax amnesty.
Innayon pay ni Atty. Jamon nga ita a tawen ket isimsimpada paylaeng dagiti kaso nangruna ta narigat ti agimbestigar gapu kadagiti limitasyon nga ituntunda ti agdama a pandemya.
