Imbinglay ni Audre Montero, maysa a BSIT Graduate manipud iti siudad ti Baguio ti nagbalin a kapadasana iti pananggun-od ti bunggoyna iti kampeonato iti kaleplepas laeng a Cyber Sea Games a naangay idiay Bangkok, Thailand idi Oktobre 26-27.
Maysa ni Montero iti uppat a miyembro ti bunggoy a nangibagi iti Pilipinas a nagkampeon iti nasao a torneo.
Ti Cyber Sea Game Tournament ket maysa nga international cybersecurity competition no sadino agsasango dagiti partisipante manipud iti nagduduma a pagilian a mangsolbar kadagiti nagduduma a karit nga adda pakainaiganna iti cybersecurity.
Daytoy ket mabalin a pasetan iti asinoman nga adda iti age range a 27 agpababa.
Iti pannakiuman ti Bombo Radyo, impeksa ni Mendoza nga adadda a kasapulan iti nasao a tournament ti technical skills, critical thinking, problem solving, ken teamwork kas maysa a grupo.
Imbinglayna a maysa kadagiti inaramid da iti nasao a torneo ket ti Capture-the-Flag (CTF)-based competition no sadino i hack da ti maysa a website ket birukenda ti nakadulin a code, file, wenno anyaman tapno makapuntos.
Kas panagsaganada a bunggoy iti nasao a kompetisyon, imbinglay ni Mendoza a nakipaspasetda kadagiti nagduduma nga online competitions sumagmamano a lawas sakbay iti torneo no sadino insursurat ken imbinglayda dagiti write ups da no kasanoda a nasolbar dagiti challenges.
Kabayatanna, imbinglay met ni Montero a daytoy ti umuna a gundaway para kenkuana a makipaset iti international competition.
Mainaig iti dayta, imbinglayna a nangrugi a maaddaan daytoy iti interes iti nasao a banag babaen iti nabuya daytoy online ken manipud sadiay, adda metten dagiti nasarakanna a website a nag-en-ensayoanna agingga nakipaspaset metten dagitoy kagiti pasalip iti rehiyon Cordillera.
Kalpasan iti panagkampeonda iti nasao a pasalip, imbinglay ni Montero nga ituloyda latta a makipaspaset kadagiti online competitions ken agtuloy latta ti collaborationda kas maysa a grupo. //kcs//
