BAGUIO CITY – Sumangsangao iti nagtutuon a kaso ti tresspassing, grave coercion ken panaglabsing iti RA 493 wenno ti saan nga otorisado a panagaramat iti military uniforms ti 14 nga indibidual kalpasan a sinerrekda ti pagtaengan ti maysa a senior citizen sadiay MRR Queen of Peace, Baguio City itay kanikadua.
Nabigbig dagitoy a da Jessie Natividad Soriano, 53-anyos; Irene Caiga Quinan,35-anyos; Roberto Aquino Suroo, 61-anyos; Serafin Escobar Santos ;Doot Berona Jr., 52-anyos; Geraldine Escuardo Bautista, 53-anyos;Arthuro Lucilo Nisperos, 61-anyos; Lewigi Soriano, 22-anyos; Elmer Calaustro, 66-anyos; Reno Mendoza, 34-anyos; Ford Alcantara, 47-anyos; Armando Biccay, 55-anyos; Joselito Bruno, 50-anyos kenni Chito Dizon 60-anyos.
Nabigbig met ti nagreklamo a ni Marilou Ulalan Monroy, 63-anyos, naasawaan, tubo ken residente ditoy Baguio City.
Iti inisyal nga imbestigasyon ti pulisya, nakasuot dagiti naireklamo iti pexilized military design nga uniporme ti Cordillera Interaction Assistance Group (CIAG), maysa a non-government organization, idi nagturongda iti pagtaengan ti nagreklamo a senior citizen.
Nangiparang dagitoy iti surat a nagtaud iti managan a Flores Guillermo Silo a mangibagbaga a tagikuana ti balay a pagnanaedan ti complainant ken ti pamilya daytoy.
Maatap a pwersado a sinerrek dagiti armado a grupo ti nasao a balay ken binalaaganda pay a pumanaw dagiti occupant iti uneg ti lima a minutos.
Mapapati nga inalaanda pay iti ladawan ken videos ti uneg ti balay kasta met dagiti agnanaed sadiay a nangitunda iti panagbuteng dagiti ubbing.
Dagus met a naiyuman kadagiti otoridad ti insidente a nangitunda iti panakatiliw dagiti grupo dagiti nadakamat nga indibidual.
Naiturong dagitoy iti kustodiya ti pulisya para umno a dokumentasion ti kaso dagitoy.
