BAGUIO CITY – Kinumpiskar ti nagtipon a pwersa ti Sadanga Municipal Police Station, PMFC-MPPPO ken PDEA-Mt. Province ti pakabuklan a 15 a bricks ti marijuana manipud iti suspek a pasahero ti parapubliko a bus sadiay Sitio Ampawilen, Poblacion, Sadanga, Mt. Province idi kalman.
Kabayatan ti naisayangkat nga interdicition operation dagiti otoridad, nakemmeg ti suspek a ni Rodeo Jimenez Cacapit, 21 -anyos, baro, ken residente ti Tondo, Manila.
Nailanad iti report a dagos a naipatungpal ti Checkpoint iti nasao a lugar idi naiyuman kadagiti otoridad ti panangawit ti suspek iti nasao a kontrabando.
Ditoy a nakumpiskar manipud kenkuana ti back pack a naikargaan ti 12 a bricks ti marijuana nga agdagsen iti 9.3 kilos ken aggatad iti P1. 116-milyon kasta pay ti sabali a bag a naglaon iti tallo a bricks ti marijuana nga agdagsen iti 3.5 kilos ken aggatad iti P420,000.
Iti pakabuklan, dumanon iti P1.536-M ti pakabuklan a gatad ti nakumpiskar manipud iti suspek.
Sumango met ita iti panaglabsing iti Comprehensive Dangerous Drugs Act ti nakemmeg nga indibidual.
