BAGUIO CITY (UPDATE)- Nakaruaren iti ospital dagiti 15 a pasahero a karaman iti pannakatnag ti maysa a mini-dump truck iti agarup 10 metro ti kaunegna a rangkis sadiay Brgy. Nambaran, Tabuk City idi kalman.
Immunan a kinuna ti driver a nagtaud dagitoy sadiay San Pascual Rizal, Kalinga ken paturongda koma sadiay Brgy. Nambaran, Tabuk City idi napukawan ti preno ti lugan ken nagdiretso iti rangkis kabayatan ti panagdalyasatda iti paset ti Tuguegarao-Cagayan Provincial Road.
Iti interview ti Bombo Radyo Baguio kenni Kalinga Police Provincial Office-Provincial Director PCol. Davey Vicente Limmong, kinunana a dagus a rinespondean dagiti otoridad ti nasao nga insidente.
Dinakamatna a dagus a naiturong iti pagagasan dagiti pasahero a buklen ti walo nga adulto ken pito a menor de edad.
Innoyona a saanen a nangipila iti kaso dagiti biktima iti driver nangruna ta amin dagitoy ket agkakabagyan.
Gapu iti daytoy, ipalpalagipda manen ti panagannad dagiti motorista nangruna kadagiti kalsada a narisgo iti aksidente.
Sigun pay kenni Col. Limmong, sumagmamano kadagiti a motorista ti napartak nga agmaneho gapu ti kinalawa dagiti kalsada a mangituntunda iti pannaka-aksidente dagitoy.
Iyap-apelana pay ti panagobserbar ken panangsurot dagiti motorista kadagiti road signages tapnu maliklikan dagiti kapada nga aksidente.
