BAGUIO CITY – Imparikep ti Permits and Licensing Division ken Public Order and Safety Division iti sidong ti Mayor’s Office ti Baguio City ti 16 nga establishimento iti merkado publiko, pakairamanan dagiti 13 a panganan a naduktalan a mangiserserbi iti arak.
Pinirmaan ni Mayor Benjamin Magalong ti closure orders dagiti 13 a pangana, maysa a pagay-ayaman ti bingo, maysa a sari-sari store ken maysa a pagaramidan ti lumpia.
Nailanad iti pammilin a dagiti panganan iti asideg ti Block 4 iti Baguio City Public Market ket addaan operasyon kas balay-paginuman ken daytoy ket panaglabsing iti Tax Ordinance 2000-001 a mangipawpawil iti panakailako ti arak kadagiti pwesto iti uneg ti merkado ti siudad.
Naamuan a ti sari-sari store ket awanan ti kaskenan a permit, ti lumpia manufacturer ket narugit ken awanan metlaeng iti kaskenan a permit bayat a ti bingo joint iti ayan ti paglakuan ti hotcake ket awanan metlaeng iti kaskenan a permit.
Naipaayan pay iti notice of violation ti maysa pay a bingo stall ken naituding a maiparikep kadagiti masungad nga aldaw.
Impetteng met ni Licensing Division Chief Allan Abayao a naballaaganen dagiti agtagikua kadagiti panganan seknan iti panagilako dagitoy iti arak idi nagpabaroda iti permit-da idi napalabas a bulan ti Enero ngem saan latta dagitoy a nagtungpal.
Innayonna a ti agdadata a saan a panagtungpal dagiti maseknan iti linteg kagiddan ti kaudian nga insidente ti panagbagsol iti nasao a disso ti nangitunda iti dagus a panangibilin ti mayor iti panakairikep dagiti nasao nga establishimento.
