Addan ti lead dagiti kameng ti pulisya iti ipupusay ti 18-anyos a babai sadiay Purok 21 San Carlos Height, Irisan, Baguio City itay nabiit.
Immunan a nabigbig ti biktima a ni Kacey Gabriel Alberto Labayen, awanan asawa ken maysa a customer care assistant iti maysa a bar sadiay Bokawkan Road, Baguio City.
Iti panakiuman ti Bombo Radyo kenni Irisan Barangay Captain Arthur Carlos, nasarakan ti lamo-lamo ken dara-dara a bangkay ti biktima iti uneg ti boarding housena.
Innayonna ni Barangay Captain Carlos a saan a simsimrek ti biktima iti trabahona iti uneg ti tallo nga aldaw.
Dinakamatna a naudi a nakontak daytoy dagiti gagayyemna, ala una ti agsapa idi Setyembre 19.
Kalpasan daytoy ket saanen a nakontak pay rason a binisita dagiti gagayyemna iti boarding house iti nasao metlaeng nga aldaw ken ditoy a nakitada ti bangkay ti biktima nga addaan iti ado a bagsol iti nagduduma a paset ti bagina.
Maibasar iti naudi a mensahe ti biktima iti gayemna, adda ti simmangpet a bisita iti boarding housena a saanna a ninaganan.
Iti agdama, saan pay a naiyawid ti bangkay ti biktima iti pagtaenganda idiay Nueva Vizcaya.
Naipakaammo metten ti napasamak kenkuana iti pamilyana nga adda itan iti siudad ti Baguio.
Makidkiddaw met ti kooperasyon ti siasinoman nga adda ammona iti nasao nga insidente, ken saan nga agbuteng dagitoy nga agreport iti barangay wenno iti pulisya.
