Pimmusay ti sangapulo ket walo a tattao ken lima a dadduma pay ti nadangran iti panagbettak iti illegal firecracker factory iti makindaya nga India .
Sigun iti pannakangiwat ti gobierno ti India a ni Rishikesh Patel, ti panagbettak ti paktoria ti rason ti pannakarba ti kongkreto nga atep a nakatayan kadagiti sangapulo ket walo a tattao ken pannakadangran ti lima a dadduma pay.
Sigun pay kenni Patel, ti factory ket agop-operate nga awanan ti lisensia.
Nangisayangkat metten ti imbestigasion dagiti otoridad iti napasamak nga insidente.
Ti paputok idiay India ket nalatak nangruna bayat ti piesta dagiti Hindu a Diwali, kasta met a maar-aramat bayat dagiti selebrasion ti kasar.
Gagangay dagiti panagbettak kadagiti talyer ti paputok, a masansan a saan nga ikankano dagiti makinkukua dagiti “basic safety requirements.”
Idi napalabas a lawas, sangapulo ket maysa a tattao ti pimmusay iti firework factory explosion iti central state ti Madhya Pradesh.
Idi tawen 2019, agarup sangapulo ket walo a tattao ti pimmusay iti agpada a panagbettak idiay Punjab state, ken pimmusay pat ti sangapulo a dadduma pay nga indibidual iti agpada a tawen idiay Uttar Pradesh.
