Maisaksakad idiay Senado babaen kenni Senator Sherwin Gatchalian ti maysa a gakat a mangipawil iti panagaramat iti social media kadagiti ubing nga agtawen iti 16 agpababa iti pagilian a Pilipinas.
Iti sidung ti Senate Bill No. 2066 wenno Social Media Safety for Children Act, maiparit ti panagrehistro, access, wenno panangpatalinaed iti account dagiti menor de edad iti anyaman a social media platform.
Panggep ti nasao a singasing nga aramiden nga ingetan ti age verification systems dagiti social media companies kas iti ID authentication, facial recognition, ken kapada a sistema.
Kasapulan metlaeng ti panangisayangkat iti regular audit tapno mabigbig ken madeactivate dagiti accounts dagiti menor de edad.
Agserbi met kas primary implementor ti Department of Information and Communications Technology (DICT ) no sadino idauloanda ti panagbantay kadagiti social media platforms ken age verification providers.
Nu maaprobaran ti nasao a gakat, posible a mamulta iti P1 million agingga P10 million dagiti social media companies nga aglabsing iti nasao a linteg ken kanayunan nga P100 tunggal aldaw bayat nga agtultuloy ti panaglabsing.//bombokaren.c.s
