BAGUIO CITY – Nakemmeg ti dua a babbai kalpasan a maatap a nagtakaw dagitoy iti uneg ti kadakkelan a mall sadiay Luneta Hill, Baguio City idi kalman.
Nabigbig dagitoy a da Rachel Guieb Borce, 32-anyos, residente ti Lower Quirino Hill, Baguio City ken Maribel Kinliha Madiwo, 21-anyos, balasang, residente ti East Quirino Hill, Baguio City.
Nagserbi a complainant iti kaso ni Daniel Villaganes Mabutas, 20 anyos ken residente ti Salud Mitra, Baguio City.
Maibasar iti report, nagturong dagiti suspek iti paglakuan a pagtatrabahuan ti complainant ket sadiay a nagtinnulong dagiti dua a mangilibas iti nagduduma a cosmetic items.
Nasiputan ti guardia ti inaramid dagiti suspek a nagresulta iti pannakakemmeg dagitoy.
Aggatad iti nasurok P4,600 dagiti produkto a maatap a tinakaw dagiti suspek.
Naiturong dagiti nakumpiskar a produkto ken dagiti suspek iti istasion ti pulisya para iti kaskenan a proseso.
