BAGUIO CITY – Nakemmeg ti dua a drug personalities ditoy siudad ti Baguio a nabayag a winanwanawanan dagiti otoridad iti buy-bust operation nga insayangkat dagitoy sadiay Luna Street, Purok 7, Irisan Barangay idi parbangon kalman.
Nabigbig dagitoy a da Edwin Beron Lee, 44-anyos, baro, construction worker, tubo ti Makati City, agab-abang sadiay Purok 18, Irisan ken maibilbilang nga street level indibidual target ti BCPO-Station 9 ken ni Renan Navia Alban, 29-anyos, baro, driver, tubo ti Donsol, Sorsogon ken agab-abang sadiay Purok 15, Irisan.
Kabayatan ti operasyon ket nakumpiskar dagiti otoridad kenni Lee ti maysa a pakete ti mapapati a shabu nga agdagsen ti 0.3 grams, maysa a pekete ti mapapati a napangago a bulong ken sabunganay ti marijuana ken maysa a drug paraphernalia.
Narekober metlaeng kenkuana ti naaramat a buy-bust money.
Simmaruno a nakemmeg sadiay Luna Street, Purok 7, Irisan ni Alban iti baet a ginandatna a naglibas babaen ti motorsiklo.
Nakumpiskar kenkuana ti tallo a pakete ti mapapati a shabu nga agsagsen ti 0.04 grams ken maysa a drug paraphernalia.
Iti agdama, sumangsango da Lee ken Alban iti kaso a panaglabsing iti Comprehensive Dangerous Drugs Act of 2002. (with reports from Bombo Brigit Marcasi)
