BAGUIO CITY – Nakemmeg ti dua a lalaki a nakamotorsiklo gapu iti panag-imetda iti paltog sadiay Bacsil-Anggad, Bangued, Abra idi agsapa kalman.
Nabigbig dagitoy a da Jonnel Millare De Mesa, 26-anyos, driver, residente ti Zone 7, Bangued, Abra ken Hershel Haboy Sianen, adda iti legal nga edad.
Maibasar iti report, pinara ti nagtipon a pwersa ti Regional Maneuver Force Battalion 15 ken Bangued Municipal Police Station ti motorsiklo a nagluluganan dagiti dua iti insayangkatda a checkpoint.
Sinukimat dagiti pulis ti dua nga indibidual ken ditoy a nakitada ti nakabukol a pag-iggeman ti paltog a naikabil iti siket ni Sianen.
Nakumpiskar kenni Sianen ti maysa a caliber 45 a paltog nga addaan ti maysa a bala, maysa a magazine a naglaon ti uppat a bala ken maysa a pouch a naglaon ti lima a bala ti kapada a kalibre ti paltog.
Sumangsangon dagiti dua iti kaso a panaglabsing iti Comprehensive Firearms and Ammunition Regulation Law ken iti COMELEC Resolution No. 10249 wenno ti gun ban.
