BAGUIO CITY – Nakemmeg ti dua a lalaki kalpasan a nagtakawda iti uneg ti Bishop’s House sadiay Baguio Cathedral Compound, Lower Gen. Luna Barangay, Baguio City idi kanikadua.
Nabigbig dagitoy a da Filber Faustino Mendoza, 22-anyos, awanan trabaho, residente ti Tacay Road, Sunnyside Fairview, Baguio City kenni Samuel Diwayan Ag-agwa, 35-anyos, awanan trabaho ken residente ti Tuding, Itogon, Benguet.
Maibasar iti blotter ti pulisya, nakita ti guwardiya iti CCTV camera ti panangbagkat ti maysa kadagiti suspek iti 55-inch flat screen television manipud iti uneg ti nasao a balay.
Kinomprontar ti nasoa a guwardiya ti nangbagkat iti telebisyon ken sadiay a nadlawna nga adda ti kadwa daytoy nga agmanmanman iti nasao a pasdek.
Dagos nga inreport ti guwardiya ti insidente iti pulisya ken narekober manipud kadagiti suspek ti nasao a telebisyon nga agatad ti P45,000.
Sumangsango ita dagiti suspek iti kaso a panagtakaw.
