BAGUIO CITY – Pimmusay ti dua a lalaki kalpasan a naaksidente ti naglugananda a motorsiklo sadiay Twin Peaks, Kennon Road, Tuba, Benguet idi rabii kalman.
Nabigbig dagitoy a da Rommick Sabusap Alonen, 24-anyos ken Ronnie Lagare Awingan, 21-anyos, agpada a residente ti Bangar, Rosario, La Union.
Maibasar iti report ti pulisya, pasalog dagiti biktima paturong sadiay Rosario, La Union idi kilaat daytoy nga immakar iti paset ti kalsada a pasang-at iti Baguio.
Nagresulta daytoy iti aksidente a panagdinnungpar ti nasao a motorsiklo ken ti maysa a pick-up a pasang-at iti siudad.
Fapu iti daytoy, naipurwak dagiti biktima ken nadanunan dagitoy dagiti emergency personnel nga awanan ti pulso.
Naitaray dagitoy iti pagagasan ngem naideklara dagiti biktima a dead on arrival.
Inkalintegan met ti driver ti pick-up a nabigbig a ni Jonel Paue, 31-anyos, residente ti Poblacion, Tuba, Benguet a naklaat daytoy idi nakasinnabatna ti motorsiklo ken ginandatna pay ti agpreno.
Naituding nga agsarita ti nasao a driver ken ti kapamilya dagiti biktima para iti panakarisut ti kaso.
