BAGUIO CITY – Natiliw ti dua a lalaki a residente ti Benguet a mapapati a pagtataudan ti suplay ti marijuana iti naisayangkat a buy-bust operation sadiay Novaliches, Quezon City idi kanikadua.
Nabigbig daytoy a da Daryl Comot Collera, 24-anyos ken Murray Sagong Comot, 29-anyos.
Insayangkat ti Police Station 4 (Novaliches) Drug Enforcement Unit ti Quezon City Police District (QCPD) ti operasyon ken nakalugan dagiti dua a suspek idi nakitransaksionda iti operatiba.
Nakumpiskar kadagitoy ti 20 a pidaso ti napagango a bulong ti marijuana a nabalkot ti packaging tape ken naikabil iti dua a nangisit a sako bag ken ti cellphone nga inaramatda iti transaksion.
Narekober met ti naaramat a buy-bust money a bukbuklen ti maysa a pidaso ti pudpudno a P1,000 ken 199 a pidaso ti P,1000 boodle money.
Naduktalan a nagtaud pay dagiti dua iti probinsia ti Benguet ken iti agdama ket dukduktalenda ti nagtaudan ti inlako dagitoy a marijuana ken no adda ti kakadwa dagitoy.
Nagramot ti operasyon kontra kada Comot ken Collera iti naalada nga impormasyon manipud iti maysa a suspek nga immunan a nakemmeg dagitoy itay laeng nabiit.
