BAGUIO CITY – Mangipatungpal ti lokal a gobierno ti La Trinidad, Benguet iti ritual kabayatan ti pannakarambak koma ti Strawberry Festival inton Marso 20.
Sigun ken ni Mayor Romeo Salda, maipatungpal ti panod-soran a kita ti ritual a pasetan dagiti mambunong, no sadino, maparti ti maysa a baboy ken maipatungpal ti kararag tapno maipakaammo kadagiti alapu ken sigud nga opisiales ti munisipio ti pannakakanselar ti pestibidad.
Maisayangkat met laeng ti sa-la-shey a maysa a kita ti ritual tapno maikararag ti panagbalin a natalged ti munisipio manipud iti Coronavirus disease 2019, African Swine Fever ken dadduma pay a parikot.
Manamnama a makipaset iti ritual ken kararag dagiti opisial ti munisipio ken dagiti lider ti simbaan.
Maipalagip a naan-anay a nakanselar ti Strawberry Festival 2020 kas paset ti panagridam kontra iti COVID 19.
