BAGUIO CITY – Nakemmeg ti dua a babbai kalpasan a nagtakaw ti nagduduma a grocery items iti maysa a dakkel a mall ditoy Baguio City.
Nabigbig dagitoy a da Jovelle Ergino, 18-anyos, balasang, sales clerk, tubo ti Sison, Pangasinan ken residente ti Honeymoon Road, Baguio City ken Jovelyn Nanguiliam, 19-anyos, balasang, sales clerk, tubo ti Banaue, Ifugao ken residente ti Irisan, Baguio City.
Maibasar iti blotter ti pulisya, nagtinnulong dagiti suspek a nangala kadagiti grocery items ken chocolates nga aggatad iti nasurok P3,700.
Naduktalan a nakaduty dagiti dua idi nagpakadada manipud iti lady guard a nakabantay sadiay tapno agturong iti comfort room.
Nupay kasta, kas maitunos iti standard operating procedure ti management ket naipasidong dagiti dua iti panagkapkap.
Nangitunda daytoy iti panakakumpiskar dagiti grocery items manipod kadagiti suspek a nakalemmeng iti uneg ti bado dagitoy.
Naiyuman ti insidente iti store manager ken impalubosna ti panakaipila ti kaso kontra kadagiti dua a suspek.
