BAGUIO CITY – Nakemmeg ti dua a turista gapu iti panangibiaheda iti marijuana sadiay Mt. Polis, Lubu-ong, Hungduan, Ifugao idi kalman.
Nabigbig dagitoy a da Dave Archer Canlas Tiozon, 20-anyos, residente ti Talipapa, Quezon City ken Xeus Marquez Dela Cruz, 21-anyos, residente ti Novaliches, Quezon City.
Nakemmeg dagiti dua iti checkpoint nga insayangkat ti Banaue Municipal Police Station ken 1504th Company, Regional Maneuver Force Battalion-15.
Nakalugan dagiti dua iti bus a paturong sadiay Cubao, Quezon City ken nakemmeg dagitoy kalpasan a nakumpiskar iti ikotda ti 11 a bags ti dried marijuana leaves nga agdagsen ti 8 kilos ken aggatad ti P96-K.
Sumangsango ita dagiti dua iti panaglabsing iti RA 9165 wenno iti Comprehensive Dangerous Drugs Act of 2002.
