BAGUIO CITY – Naipaima iti DSWD ti dua a menor de edad kalpasan a nakemmeg dagitoy iti nagsina a buy-bust operation sadiay Bangued, Abra.
Immuna a nakemmeg ti 17-anyos a balasitang iti buy-bust operation sadiay Calaba, Bangued.
Nakumpiskar kenkuana ti maysa a pakete ti maatap a shabu ken narekober ti naaramat a 1,000 peso boodle money.
Simmaruno a nakemmeg ti 16-anyos a barito iti buy-bust operation sadiay Zone 6, Bangued, Abra.
Nakumpiskar kenkuana ti dua a pakete ti maatap a shabu ken sumagmamano a drug paraphernalia bayat a narekober ti naaramat a boodle money.
Sigun iti barito, binilin laeng daytoy ti kasinsinna a mangideliver iti maysa a pakete ti shabu kasukat ti P200.
Kinuna met ti pulisya a ti dua a menor de edad ket karaman iti listaan ti PNP – Directorate for Intelligence kadagiti drug personalities.
Sumangsango ita dagiti dua nga agtutubo iti kaso a panaglabsing iti RA 9165 wenno ti Comprehensive Dangerous Drugs Act of 2002.
