BAGUIO CITY – Mabirbiruk paylaeng dagiti dua nga estudyante a naiyanod kabayatan ti family outing dagitoy iti Chico River sadiay Tabuk City, Kalinga idi kalman, February 1.
Nabigbig dagitoy a da MAYBELLE DELA CRUZ GONZALO, 20-anyos ken FRANK SMITH DELA CRUZ GONZALO, 17-anyos, agpada a residente ti Purok 2, Bulanao, Tabuk City.
Maibasar iti report, nagturong ti pamilya dagitoy iti asideg ti maysa a pagdaratan sadiay Chico River tapnu agaliwaksay.
Napan naglangoy ti dua ken dagiti dadduma a kapamilyada iti nauneg a paset ti karayan kagiddan ti panagalada ti ladawan.
Nupay kasta, nangngegan laengen ti panagpa-arayat dagiti kapamilyada kalpasan a nakita ti panakaiyanod dagiti dua.
Ginandatda nga ispalen dagiti dua ngem napaay dagitoy gapu iti kapigsa ti ayus ti danum iti karayan.
Nagpa-arayat met kadagiti otoridad dagiti kabagian dagiti dua para iti manarimaan a search and rescue operation.
