BAGUIO CITY–Nasarakan ti bangkay ti maysa a senior citizen sadiay Basig Field, Poblacion Tadian idi rabii kalman.
Nabigbig daytoy a ni Robert Atiwen Gabat, 83-anyos, naasawaan ken residente iti Poblacion,Tadian,Mt.Province.
Sigun iti hepe ti Tadian Municipal Police Station a ni Pol.Lt Denio Pacio, naireport iti opisina dagitoy a mapukpukaw ti biktima idi paiylaeng Pebrero 28 ngem saanda a nabirukan.
Kinunana nga adaan iti panagkabaw ti biktima ken agmaymaysa daytoy a pimmanaw iti pagtaenganna.
Iti sabali a bangir, saan a simmardeng dagiti maseknan a pamilya aggingga a nabirukan ti marunrunot a bangkay daytoy iti maysa a creek.
Dagus met a nangisayangkat dagitoy iti retrieval operation babaen iti tulong ti Bureau of Fire of Protection kalpasan a naipadamag kadakuada ti nasao nga insidente.
Kabayatanna, pimmusay ti maysa a lalaki kalpasan a naidungpar ti imanmanehona a motorsiklo iti maysa a van sadiay Caucalan, Taloy Sur, Tuba Benguet idi kalman.
Nabigbig daytoy a ni Marl Loui Fernandez Aglosolos a residente ti Bal-Marcoville Baguio City bayat a ti van a nakadinnungpar daytoy ket imanmaneho ni Henry Batoyog Mahunag Jr. a residente iti Botiwtiw Km4 La Trinidad, Benguet.
Maibasar iti report, nag-overtake ti nakamotorsiklo a ni Aglosolos iti sarsarunuenna a lugan ngem idi agsubli daytoy iti linyana ket naidungpar daytoy iti van.
Dagos a naiturong iti paggagasan ti rider ngem naideklara daytoy a dead on arrival gapu iti napasaran a dunor iti nagduduma a paset ti bagina.
Nakemmeg met ti dua a lalaki sadiay San Carlos Extention, Brgy. Irisan Baguio City babaen iti buy-bust operation nga impatungpal dagiti otoridad idi rabii.
Nabigbig dagitoy a da Ezekiel Delacruz Talam, 33-anyos, baro ken tubo iti Mandaluyong City ken ni Stephen Vincent Medina Peralta, 32-anyos, baro ken residente iti Soldiers Hill Village, Muntinlupa City.
Sigun kadagiti otoridad, nailista ni Peralta kas High Value Target iti iligal a droga bayat a newly identified drug personality met ni Talam.
Nakumpiskar met kadagiti dua ti lima a pakete ti maatap a shabu nga aggatad iti P47,600 ken agdagsen iti pito a gramo, tallo a cellphone, buy-bust money, sling bag, plastic sachets ken maysa a metal casing.
Sumangsango dagitoy iti kaso a panaglabsing iti RA9165 wenno Dangerous Drugs Act of 2002.
