BAGUIO CITY – Agpapaimbag ti dua a lalaki kalpasan a nadangran dagitoy iti panakauram ti pagdagdagusanda a kalapaw sadiay Marcos Highway, Sto. Tomas Proper, Baguio City idi rabii.
Nabigbig dagitoy a da Ramil Santos, 34, naasawaan, ken ni Arnel Harapa, 37, awanan iti asawa, agpada a truck helper ken residente iti nasao a lugar.
Maibasar iti blotter ti pulisya, naginom iti arak dagiti dua a biktima idi rabii, ken ti inaramatda a silaw ket kandila.
Naturog dagitoy a saanda nga iniddep ti kandila, ken daytoy ti mapapati a nagtaudan ti uram.
Iti met panagresponde dagiti kameng ti Bureau of Fire Protection ket sinebsebanda ti uram bayat a naitaray iti ospital dagiti dua a biktima.
Mapattapatta a dumanon iti sangapulo a ribu a pisos ti gatad dagiti kagawaan a nauram iti nasao a kalapaw.
