BAGUIO CITY – Mapadayawan ti Igorot boxing promoter a ni Brico Langbay Santig iti maangay a World Boxing Council (WBC) – Asian Boxing Council (ABC) Conference a maangay inton March 14-16 sadiay Bangkok, Thailand.
Maawatna ti pammadayaw kas 2019 Southeast Asia Boxing Promoter of the Year.
Sigun iti WBC, mapadayawan ni Santig gapu iti dakkel a kontribusionna iti panakaital-o ti boksing ken muay thai.
Inimbitaranda metlaeng ti promoter a makipaset iti tallo nga aldaw a conference a marugian babaen iti gala night a pakapadayawan dagiti top boxing promoters iti abagatan daya ti Asya.
Maipalagip a ni Santig ti agtagikua iti Highland Boxing Promotions a masarakan sadiay La Trinidad, Benguet ken pagsansanayan dagiti adu a nalalaing ken kampeon iti boksing.
Addaan metlaeng daytoy iti boxing gym sadiay Manila ken Bangkok, Thailand a pagnanaedanda ita iti pamilyana.
Nakaaw-awat metten daytoy iti nagduduma a pammadayaw kas iti 2019 Boxing Promoter of the Year ti Kafagway/Kordillera International Sports Luminary Awards Podium bayat a nabigbig ti Highland Boxing Promotions kas Best Boxing Promotion iti Pilipinas idi napalabas a tawen babaen ti BoxRec.
