BAGUIO CITY – Nabigbig a New Year Baby ti Silahis ng Pasko ditoy Baguio City ti maladaga a ni John Syl Damortis nga anak da Marcelo ken Gennlyn Sayangda manipud Poblacion, Tuba, Benguet.
Naipasngay daytoy sadiay Baguio General Hospital and Medical Center iti alas dose singko idi parbangon ita nga umuna nga aldaw ti Enero 2020.
Kabayatanna, makumkumpirmar ti eksakto nga oras a naipasngay ti lalaki a maladaga a naawagan ti Baby Paspasan kalpasan a naamuan a nagpasngay ti ina daytoy kabayatan ti panagbiaheda paturong iti nasao nga ospital.
Naipasngay met iti alas dos uno idi parbangon ni Baby Gumilab bayat a naipasngay iti alas dos biente singko idi parbangon ni Baby Cabuang.
Manamnama a maipaayan ti New Year Baby iti sagot a bukbuklen ti baby clothes, diapers ken dadduma a pagkasapulan ti maladaga malaksid pay iti cash gift babaen kenni Silahis ng Pasko 2019 organizing chairman Fritz Gerald Padilla.
