Pagsagsaganaan manen ti probinsiya ti Apayao ti panaghost dagitoy iti maysa pay a regional sporting event para met iti tertiary level.
Daytoy ket kalpasan ti naballigi a panaghostda iti kaleppas a Cordillera Administrative Region Athletic Association wenno CARAA Meet 2024 idi Abril 15 agingga Abril 19.
Nasurok dua ribu nga estudyante, atleta, coaches ken opisyales manipud iti pito nga state universities and colleges iti Cordillera ti manamnama nga agturong idiay Apayao para iti 2024 Cordillera Administrative Region Association of State Universities and Colleges wenno CARASUC athletic meet inton Abril baente nuebe agingga Mayo 3.
Ti CARASUC athletic meet ket tinawen a maipatpatungpal nu sadino ditoy nga agbabballubal dagiti college students manipud iti nagduduma a pagadalan iti rehion para iti pannakaital-o ti sportsmanship.
Karaman ditoy ti Apayao State College, University of Abra, University of the Philippines-Baguio, Benguet State University, Ifugao State University, Kalinga State University, ken ti Mountain Province State Polytechnic College.
Ti agserbi a venue kadagiti nagduduma nga ay-ayam ket idiay Luna, Pudtol, ken Santa Marcela, Apayao.//Cara
