Pinirmaan dagiti dua pulo ket dua a senador ti resolusyon a mangkidkiddaw iti gobyerno a temporaryo a suspendirenda ti implementasyon ti Public Utility Vehicle Modernization Program (PUVMP) wenno ti maaw-awagan itan iti Public Transport Modernization Program (PTMP).
Ni laeng Senador Risa Hontiveros ti saan a nagpirma iti nasao a resolusyon nu sadino awan pay ti pammalawag manipud kenkuana.
Sigun kadagiti senador, masapul a masuspendir paylaeng ti nasao a programa gapu iti agtultuloy a pannangipeksa dagiti driver, grupo, union ken transport cooperative kadagiti arungaingda maipapan iti Public Transport Modernization Program a saan paylaeng a nasolsolusyonan ti Department of Transportation.
Karaman ditoy ti gastos ken ti nangato a bilang dagiti unconsolidated PUV units nga adda pakainaiganna iti kurang nga information campaign ti gobyerno tapno mailawlawag ken maipakaawat kadagiti driver, operator ken transport group ti kinapateg ti moderno a public transportation.
Maipalagip a nagleppasen ti consolidation ti Public Utility Vehicle idi pay Abril trenta iti agdama a tawen.
