Nawayawayaan ti dua gasut ken dua pulo a Pilipino a naibalud idiay United Arab Emirates kalpasan a naipaayanda ti pardon, wenno pammakawan ti gobierno sadiay, sigun iti Department Foreign Affairs.
Maibasar iti datos manipod iti Hunyo idi napalabas a tawen, dumanon iti tallo gasut a Pilipino ti naibalud iti nasao a lugar ken nawayawayaan gapu iti pardon.
Sigun kenni DFA Undersecretary Ma. Theresa Lazaro, naited kadagiti Pilipino ti pardon iti sanguanan ti panagrambak ti National Day idiay United Arab Emirates idi Disiembre a dos idi napalabas a tawen.
Kinuna ni Lazaro a naipaay ti panagpakawan kadagiti nasao a Pilipino a naibalud gapu iti naisangsangayan a panaggayyem iti nagbaetan ti dua a pagilian.
Manarimaan metten ti panagasikaso ti DFA ken Philippine Embassy idiay Abu Dhabi ti panangiproseso dagiti dokumento kadagiti nasao a Pilipino tapno maiyawid dagitoyen iti Pilipinas.
Pinagyamanan met ni President Ferdinand ”Bongbong” Marcos Jr. ti gobierno ti United Arab Emirates iti panangipaayda ti pardon kadagiti nasurok dua gasut a Pilipino.
Sigun kenni Lazaro, sumangsango iti nagduduma a kaso idiay UAE dagiti napakawan a Pilipino.
Idi Hunio idi napalabas a tawen, adda ti sangagasut uppat a pulo ket tallo ti naibalud a Pilipino ti naipaayan metlaeng ti pardon bayat ti panagrambakda met ti Eid’l Adha.
