BAGUIO CITY – Nakemmeg ti maysa a lalaki kalpasan nga inagaw ken intarayna ti cellphone nga aggatad iti P14-K sadiay Session Road, Baguio City idi kalman ti parbangon.
Nabigbig ti suspek a ni Jovie Amamangpang, 24-anyos ken residente ti San Carlos Heights, Baguio City.
Maibasar iti imbestigasyon, nagtaud ti 22-anyos a biktima iti balay- paginuman, naglugan ti taxi ken bimmaba iti session road.
Bayat a nakatugaw iti sangwanan ti maysa a bangko, killaat nga inala ti suspek ti cellphone daytoy.
Timmaray ti suspek paturong iti Mabini Street ngem kinamat ti biktima.
Babaen iti panagpukpukaw ti biktima ket sumagmamano a netizens ti nangtulong kenkuana a mangkamat iti suspek.
Naiturong ti suspek iti Public Order and Safety Division (POSD) sakbay a naipaima iti BCPO Station 7.
