Nagbakwit dagiti lima pulo ket tallo a pamilya wenno bukbuklen dagiti 245 nga indibidual iti siudad ti Baguio gapu paylaeng ti panagdalapos ti bagyo a Pepito.
Sigun iti City Social Welfare and Development Office, uppat a pulo ket innem a pamilya wenno 211 nga indibidual dagiti agnanaed kadagiti evacuation centers bayat a pito a pamilya wenno tallo pulo ket uppat nga indibidual ti nagdagus kadagiti pagtaengan dagiti kakabagyanda.
Dagiti nagbakwit nga indibidual ket manipud idiay Lourdes Subdivision Extension, City Camp Central, Guisad Surong, Irisan, San Luis Village, Dominican-Mirador, Lower Rock Quarry, Padre Zamora ken Quezon Hill Proper.
Iti agdama, agtultuloy latta ti panagbantay ti lokal a gobierno iti siudad ti bagyo tapno maipasigurado ti seguridad ti tumunggal maysa bayat ti mapaspasaran a bagyo.
