Impakaamo ti Philippine National Police (PNP) idi kalman a manamnama ti publiko ti napardas a tallo agingga iti lima a minuto nga emergency response kalpasan ti panag-dial iti 911.
Iti maysa a statement, inkari ti PNP a dagiti responders ket makadanonda iti maysa nakapasamakan ti insidente iti uneg laeng ti lima a minuto, nga addaan iti baro a sistema ti 911 a paandaren ti isu met laeng a teknolohia a maus-usar idiay Estados Unidos ken Europa.
Sigun kenni Office of Communications and Electronics Services (CES) Director Police Brigadier General Warren Gaspar Tolito , ti 911 Call Handling System ket palubosanna dagiti kameng ti Philippine National Police a mangsungbat kadagiti distress calls ken mangipaay iti emergency response.
Tapno agkiddaw iti tulong babaen ti 911, masapul nga i-dial dagiti umili ti numero —babaen ti cellphone wenno landline— ken pinduten ti 1.
Dagus a maikonektar ti tawag iti PNP, ken mabalin nga ikeddeng dagiti dispatchers ti eksakto a lokasion ti timmawag ken mangideploy kadagiti first responders iti sumagmamano a segundo.
Binalakadan ni Tolito ti publiko nga agtalinaed a kalmado bayat ti panagtawag dagitoy iti 911.
Kagiddan ti bakasion, impalagip ni Tolito kadagiti umili ti panagngato ti posible nga aksidente ken emergency gapu iti trapiko, “electrical overload,” saan nga umno a panagusar iti paputok, ken nalabes a panaginum iti taraon ken inumen.
