BAGUIO CITY – Awan ti maipatugpal a panagpabakuna kontra iti COVID-19 kadagiti senior citizens ditoy Baguio City ita nga aldaw ti Huebes, April 15.
Iti paka-ammo ti City Health Services Office, urayen paylaeng ti maseknan a sektor ti waragawagda no kaano a maipatungpal ti panagbakuna kadagitoy.
Naituding met inton bigat, April 16 ti panagpabakuna kontra iti COVID-19 kadagiti health workers para iti second dose dagitoy ken dagiti nabatbati a health workers para iti first dose dagitoy.
Nailanad iti paka-ammo a dagiti laeng nakaawat ti text message manipud iti lokal a gobyerno ti Baguio ti agturong iti vaccination site.
Kabayatanna, ita met nga aldaw a marugian ti tallo nga aldaw nga agressive community testing a maangay sadiay Melvin Jones Grandstand ken agleppas inton Sabado, April 17.
Mabalin nga agpa-test dagiti construction workers, call center agents/BPOs, food handlers, grocery store workers, bank employees, security guards, uniformed personnel, employees of regional line agencies ken city government employees.
Innaldaw a 1,000 nga indibidual ti maakomodar isut gapuna a ‘first come, first served basis’ ken nasken laeng a mangiparang iti maysa a balido nga ID dagiti interesado nga agpa-test.
