Nadangran ti tallo nga indibidual iti napasamak a panagsusuppiat iti kalsada idiay Antipolo City idi malem ti Domingo.
Sigun iti Antipolo police, ti insidente ket napasamak iti agarup alas 5 pm iti Barangay San Jose section ti Marcos Highway.
Dagiti biktima ket nabigbig a da “Peter”, 52-anyos, businessman, a nagsagrap ti pannakadangran ti ulo; “Patrick”, 22-anyos, maysa a college student a natamaan ti makannawan a takiagna, ken “Davis”, 29-anyos, a napaltugan iti makannawan a barukongna bayat ti panangpadasna a mangpakalma iti kasasaad.
Amin dagiti tallo ket dagos a naiturong iti Cabading Hospital para iti pannakatamingda.
Kinuna ti polis a ginandat ti suspek a ni “Kenneth”, maysa a 28-anyos a negosiante, ti aglibas babaen ti nangisit a Toyota Fortuner-na ngem natiliwan bayat ti hot pursuit operation.
Natiliw daytoy iti maysa a checkpoint sadiay Masinag, Barangay Mayamot, Antipolo City.
Iti agdama, adda iti kustodiya ti pulisya ti suspek bayat nga isagsagana dagiti otoridad ti maitutop a kaso kontra kenkuana.
Guyguyuguyen met ni Antipolo Component City Police Station Acting Chief Police Lt. Col. Ryan Lopez Manongdo dagiti saksi wenno siasinoman nga addaan iti kanayonan nga impormasion nga umasideg tapno tumulong iti imbestigasion.
Kabayatanna, kinumpirmar ti maysa nga opisial ti Rizal Provincial Police Office a ti suspek ket awanan ti Certificate of Authority manipod iti Commission on Elections a mangiggem ti paltog, gapu iti agtultuloy a nationwide election gun ban.
