BAGUIO CITY–Dumanon iti nasurok 300 a left leaning individuals ti nabigbig ti Police Regional Office Cordillera (PROCOR) a pakairamanan dagiti government officials ken kameng ti media iti rehiyon Cordillera.
Sigun kenni PROCOR Regional Director PBGen. R’win Pagkalinawan, dagiti nasao a bilang ti indibidual ket dagiti sumupsuporta kadagiti makakannigid a grupo.
Kinunana a puntiryada a rugian ti Oplan Tokhang ita a bulan kadagiti left leaning individuals no sadino tarigagayda metlaeng nga ileppas daytoy ita a bulan ti Marso.
Inlawlawagna a nadalos ti intensionda iti pannakaipatungpal ti Oplan Tokhang no sadino agturongda kadagiti pagtaengan dagiti left leaning individuals ket sadiayda a mangipaay ti impormasyon seknan iti gobierno.
Kinunana a guyuguyenda dagitoy nga agsubli iti gobierno kadwada dagiti dadduma nga ahensya.
Impetteng pay ni PBGen. Pagkalinawan a ti Oplan Tokhang ket maysa a bloodless activity nga addaan panggep nga isubli dagiti indibidual a mangsupsuportar kadagiti CPP-NPA iti gobierno.
Imbignlayna nga iti kanito a saanda a dumngeg kadagitoy ket mismo a dagitoyen ti mangipila ti kaso kontra kadakuada.
