Inikkat ti social media platform a TikTok iti agarup 4.5 a milion a video iti pagilian gapu iti community guideline violations wenno panaglabsing iti pagannurotan.
Naikkat dagitoy manipod idi July agingga September idi napalabas a tawen, nga addaan ti 98% a naikkat iti uneg ti 24 nga oras, sigun iti TikTok idi kalman.
Kinuna ti Tiktok nga agar-aramatda ti “human and automated moderators” tapno mareview dagiti panaglabsing.
Dagiti “post” a mangitantandudo wenno mangpangta iti kinaranggas, dagiti post a mangitantandudo iti pananggundaway dagiti agtutubo wenno material iti seksual a panangabuso iti ubing ken panangilako iti tao, malaksid iti dadduma pay a rason, ket rason iti pannakaikkat ti account ti maysa.
Sigun iti public policy manager a ni Peachy Paderna, ti TikTok ket addaan ti nabayagen a polisia kontra kadagiti political ads.
