Inlawlawag iti Armed Forces of the Philippines (AFP) ita a Huwebes, Mayo 14, nga awan ti pakainaigan dagiti suldado iti pammaltog a naisayangkat iti Senado idi kalman iti rabii.
Sigun kenni AFP Chief General Romeo Brawner Jr., dagiti Marina a naimatangan kadagiti video iti uneg iti Senado ket nakadeploy laeng kas paset iti regular a pagrebbenganda iti seguridad dagiti government facilities, ken saanda a nagpaputok iti paltog.
Inlawlawagda metlaeng a ti Marine Security and Escort Group ket nadutukan iti panangsalaknib kadagiti pasdek a kas iti Senado, Kamara, ken dadduma pay nga opisina iti gobierno, ken saan a para iti seguridad iti maysa nga indibidual a senador.
Kabayatanna, sigun iti pulisia, maysa a drayber iti National Bureau of Investigation (NBI) ti nakemmeg kalpasan a nangngeg iti sumagmamano a kanalbuong iti uneg iti Senado idiay Pasay City.
