BAGUIO CITY – Na-rescue ti uppat a gangannaet ken dua a Pilipino nga agturong kuma ditoy Baguio City kalpasan a na-stranded ti luganda sadiay Kennon Road, partikular sadiay Camp 5, Tuba, Benguet idi rabii.
Nabigbig dagiti nasao a turista a da Xie Hua Lin manipud Taiwan, Mehmet Caylan manipud Turkey ken da Uara Reda Abdelrady ken Fanouk Farouk nga agpada a manipud Egypt.
Nabigbig met dagiti Pinoy a kadwa dagitoy a da Sarah Romblon ken Rick Carlos nga agpada a taga-Manila.
Sigun kenni PMaj. James Acod, hepe ti Tuba PNP, nagtaud dagiti turista a nakalugan iti maysa a kotse sadiay San Juan, La Union ken agturongda kuma ditoy Baguio.
Nagna dagitoy iti Kennon Road kalpasan a saanda a nakita ti warning sign a nakamuntar iti entrance ti tollgate sadiay Camp 1, Tuba gapu iti kapigsa ti tudo.
Nailanad iti signage a maipawpawil ti panagdalyasat dagiti motorista iti Kennon Road.
Gapu iti daytoy, napupok dagiti nasao a turista iti paset ti Camp 5, Tuba gapu iti nargaay a daga ken batbato sadiay.
Nagpatulongda met kadagiti residente iti nasao a disso.
Naiturong dagiti nasao a turisya iti pagtaengan ti maysa a konsehal ti munisipyo ken sadiayda a pinalabas ti nagpatnag.
