BAGUIO CITY – Nakaawat iti nagduduma a benepisyo ti uppat a sigud a rebelde sadiay Poblacion, Lagawe, Ifugao.
Indauluan ni Department of the Interior and Local Government (DILG) – Ifugao Provincial Director Regina Elizabeth Mammag ti panakaipaay ti tulong ken benepsyo kadagiti nasao nga indibidual babaen iti Enhanced Comprehensive Local Integration Program (E-CLIP).
Nagduduma ti naipaay a gatad kadagiti sigud a rebelde, depende iti Firearm Remuneration dagitoy.
Naamuan a ti maysa ket nakaawat ti P90,000 bayat a ti maysa ket nakaawat met ti P100,000 ken ti dua pay ket nakaawat iti sag-P10,000.
Impanamnama ni Lt. Col. Narciso Nabulneg, commanding officer ti 54th Infantry Battalion ti Philippine Army a mapapartak ti panakaipaay dagiti kanayonan a tulong kadagiti rebelde a simmuko iti gobierno.
Kagiddan iti daytoy ket inallukoy ti militar ken ti gobyerno dagiti kameng dagiti rebelde a grupo a sumukon dagitoy tapno maaddaanda iti nasaysayaat ken naranraniag a biag.
