BAGUIO CITY – Nakemmeg ti uppat nga indibidual, pakairamanan ti maysa a menor de edad iti nagdina a buy-bust operation nga insayangkat dagiti pulis iti rehiyon Cordillera idi napalabas a lawas.
Nakemmeg iti pagtaenganna sadiay Betag, La Trinidad, Benguet ni Dave Arquero Bugarin alyas Bangkay, 37-anyos, vegetable porter kalpasan a nakumpiskar kenkuana ti maysa a pakete ti mapapati a shabu.
Nakemmeg met iti pagtaenganna sadiay Palmaville, Puguis, La Trinidad, Benguet ni Jayson Nazareno Salvador alyas Boy, 23-anyos, vegetable retailer kalpasan a nakumpiskar kenkuana ti uppat a pakete ti mapapati a shabu.
Agpada pay a nakemmeg ti 18-anyos a ni Junjun Battung Vital ken ti 17-anyos a kadwana sadiay Buyucan, Nambaran, Tabuk City, Kalinga kalpasan a nakumpiskar kadakuada ti maysa a pakete ti mapapati a shabu ken sando bag a naglaon ti mapapati a napagango a marijuana.
