Nakaawiden iti pagilian dagiti 46 nga overseas Filipino workers (OFWS) manipud sadiay Kuwait.
Sigun iti Overseas Workers Welfare Administration (OWWA) karaman metlaeng dagiti 17 a Filipino tripulante a nakalasat iti insidente iti M/V Minoan Dignity.
Maipalagip a 18 a Filipino crew members ti naglugan iti M/V Minoan Dignity idi natamaan iti saan paylaeng a nabigbig a projectile bayat ti panaglayag daytoy iti Strait of Hormuz idi Agosto 18, 2026.
Pimmusay ti maysa a Filipino chief engineer iti nasao nga insidente, idinto a 17 a Filipino crew members ti naispal.
Kalpasan ti rescue operation, naiturong dagiti seafarers sadiay Khasab, Oman para iti repatriation dagitoy.
Naipaayan metten dagitoy iti tulong babaen iti OWWA.
Kabayatanna, inkari ti ahensiya nga agtultuloy a suportaranna dagiti OFW a na-repatriate.
Karaman ditoy ti pannakaipaay ti welfare, financial, livelihood, employment, counseling, ken dadduma pay a reintegration assistance, depende iti kasapulan ken kualipikasyon dagitoy.
