Pimmusay ti dua nga overseas Filipino worker (OFW) kalpasan a pinalpaltugan ti amoda idiay Beirut, Lebanon.
Sigun iti Department of Migrant Workers (DMW), agpada a household service workers dagiti biktima a mangmangged iti maymaysa a pagtaengan idi napasamak ti hostage incident idi Abril 15. Addan iti kustodia ti pulisia ti suspek ken manamnama a mapilaan iti kaso.
Makikikoordinaren ti DMW iti embahada ti Pilipinas idiay Lebanon ken kadagiti lokal nga otoridad tapno maipasigurado ti nainget nga imbestigasion.
Imbilin metten ni Migrant Workers Secretary Hans Leo J. Cacdac kadagiti opisial ti dagos a panangipaay iti tulong kadagiti naulila a pamilia, karaman ti repatriation ken panag-access kadagiti benepisio.
Personal metlaeng a bimmisita dagiti sumagmamano nga opisial ti DMW tapno makipagladingit ken ipasigurado ti suporta ti gobierno, kagiddan iti panawagan a magun-od ti hustisia para kadagiti pimmusay nga OFW.
