BAGUIO CITY – Sumangsango ti 47-anyos a mannalon iti kaso a panaglabsing iti Republic Act 9165 wenno ti Comprehensive Dangerous Drugs Act of 2002.
Kasaruno daytoy ti panakakemmegna iti operasyon nga insayangkat ti PNP Drug Enforcement Group Cordillera, La Trinidad MPS, Provincial Drug Enforcement Unit Benguet, Philippine Drug Enforcement Agency Cordillera, ken dadduma pay a unit ti pulisya idiay La Trinidad, Benguet idi kalman, Agosto 29.
Naisayangkat ti search warrant iti pagtaengan ti suspek a nakaduktalan dagiti iligal a droga.
Nakumpiskar iti pagtaenganna ti suspek ti dua a pakete ti maatap a shabu, maysa nga small bottle a naglaon ti maatap a shabu nga agdagsen iti agarup 1.5 grams ken mapatta-patta nga agbalor iti P10,200.
Naala metlaeng dagiti sumagmamano a kagawaan kas iti dua nga improvised plastic tooter, maysa nga pidaso ti electronic weighing scale ken daduma pay a naaramat iti nasao a transaksyon.
Ti suspek ket adda iti kustodiya ti PNP Drug Enforcement Group Cordillera bayat a naipaima dagiti drug evidence iti Regional Forensic Unit – CAR para iti laboratoy examination daytoy idiay Camp Bado Dangwa, La Trinidad, Benguet.
