BAGUIO CITY – Inaklon ti mangidadaulo iti transport sector ti Region 1 ken Cordillera a nasurok 50% itan kadagiti jeepney drivers ken operators iti pagilian ti boluntaryo a simmardeng a nagpasada iti nagduduma a lugar.
Gapu daytoy iti agtultuloy a panagngato ti presyo dagiti produkto ti petrolyo.
Iti interview ti Bombo Radyo Baguio, kinuna ni Pat Evangelista a daytoy ti datus a naalada iti agtultuloy nga koordinasyon dagiti miembro ti Liga ng Transportasyon at Operators ng Pilipinas.
Kaadoan kadagiti nagboluntaryo a simmardeng pay nga agpasada dagiti saan a nakastrek wenno nairaman a naipaayan ti ayuda manipod iti gobierno.
Sigun kenkuana, karaman metlaeng dagiti sumagmamano nga operators ken drivers iti Cordillera a nangibaga a saandan nga kabaelan ti agoperate gapu iti kinangato ti presyo ti petrolyo.
Impeksana nga addan dagiti nangirugi iti tigil pasada isunga nagkiddaw daytoy ti dispensar iti publiko nu maobserbaranda daytoy kadagiti masungad nga aldaw iti lokalidad.
