BAGUIO CITY – Pimmusay ti 52-anyos a construction worker bayat a nadangran ti kadwana kalpasan a naaksidente dagitoy idiay Pinewoods Subdivision, Sta. Lucia Km 3, Asin Road, Baguio City itay laeng agsapa, Abril 23.
Ti pimmusay a biktima ket maysa a lalaki, tubo ti Samar ken residente ti Baguio City.
Maibasar iti report ti Baguio City Police Office, apan koma agmeryenda ti biktima ken ti katrabahona idi naawanan ti preno ti naglugananda a motorsiklo a nangitunda iti pannakaidungparda iti poste ti kuryente.
Nagsagrap ti biktima ti nakaro a dunor iti ulona gapu ta awanan daytoy ti helmet bayat a manarimaan ti panagpaagas ti kadwana iti ospital.
Kabayatanna, nagpalagip manen ti pulisya kadagiti motorcyle rider nga agsuot dagitoy ti helmet kas proteksyon iti kanito a mapasamak ti aksidente.
