BAGUIO CITY – Ipampangruna ita ti Philippine Drug Enforcement Agency (PDEA)-Cordillera ti panakakemmeg dagiti High Value Individuals ti illegal a droga iti rehiyon Cordillera.
Sigun kenni PDEA-Cordillera Regional Director Gil Castro, manarimaan ti panangiwanawanda iti agarup 57 a high value individuals iti iligal a droga kas maibasar iti monitoring system dagiti babbarangay ken beripikasyon nga insayangkat dagiti pulis ken personnel ti opisinada.
Kinunana a no makemmeg dagiti nasao nga indibidual ket adda metlaeng ti sumukat iti listaanda gapu paylaeng iti agtultuloy a panagwanawan dagiti otoridad iti sitwasyon ti illegal drug trade iti rehiyon.
Nupay kasta, dinakamatna a nakalukat met latta ti community rehabilitation program para kadagiti agar-aramat ti iligal a droga a kayatda ti agbaliw tapno agsublida iti normal a panagbiag.
Imballaagna pay ti panangtiliw ti PDEA kadagiti nasao nga indibual a saan a makipaset iti community rehabilitation program ken mangituloy iti iligal nga aramid seknan iti iligal a droga.
